Writings Photos Code Contact Resume
مش عايزين تعديل دستور .. عايزينك ترحل وتغور

You are here

Submitted by msameer on Thu, 22/03/2007 - 9:03pm

يوم الأحد 25\3 الساعة 6 الحديقة المستديرة بميدان التحرير - القاهرة
يوم الأحد 25\3 الساعة 6 هنكون كلنا في ميدان التحرير , كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل الشارع ومش هنخاف ومش حنسيب بلدنا عشان احنا أصحابها .

ادى نص التعديلات
شرح عند ربة السيف و القلم

الحق يا مصري آخر مظاهرة قبل الغاء الجمهورية واعلان مصر عزبة مستقلة
مش عايزين تعديل دستور .. عايزينك ترحل وتغور
يوم الأحد 25\3 الساعة 6 مساء هنعتصم في ميدان التحرير و نبات الليلة دي عشان نقول لأكبر عدد ممكن من أخواتنا على خطر تعديلات الدستور.

يوم الاثنين فيه استفتاء على تعديل 34 مادة في الدستور المصري دستور بلدنا اللي بيقول البلد تمشي إزاي وبيحدد حق وواجب كل واحد فينا, التعديلات دي الحزب الوطني عملها بمعرفته .. تعديلات تفصيل على مقاس جمال بيه , عشان محدش يتكلم أو يعترض أو يطالب بحقه أو يرفع راسه , مش كدة وبس كلنا هنكون مهددين في الشارع وفي شغلنا وبيوتنا وأكل عيشنا .

تعديل المادة 179 بيدي الحق لأي أمين شرطة إنه يدخل بيتك ويفتشك ويراقبك ويراقب تيلفونك ويسجلك صوت وصورة ويحبسك وكل ده بمزاجه من غير إذن نيابة ولا دياولو وبعدين يوديك محكمة عسكرية لأنك إرهابي ؛ يعني مفيش حصانة لمحامي ولا صحفي ولا قاضي ؛ يعني مفيش عدل ولا صحافة ولا قانون , وكله بالدستور يا بيه !

أما بقى تعديل المادة 88 فده بيلغي الإشراف القضائي على الانتخابات ويسيبها للداخلية وبتوع " نعم نعم يا مبارك " يطلعوا النتيجة اللي هما عايزينها . التعديلات كمان هتمنع أي مستقل يترشح للرئاسة يعني انكتب علينا وعلى ولادنا رئيس من الحزب إياه لحد ما نموت , ورئيس الجمهورية بقى من حقه يحل مجلس الشعب من غيرحتى ما يستفتي الناس ؛ يعني احنا ننتخب مجلس شعب هو ييجي يحله من دماغة ويطلعلنا لسانه .

يعني من الآخر البلد هتبقى عزبة مبارك وولده , واحنا عبيد وأنفار عندهم مالناش حقوق وكتّر خير ناظر العزبة إنه سايبنا قاعدين .

احنا بقالنا كتير بنتكلم عن الحرية والديمقراطية وحقوق الإنسان والشفافية وتداول السلطة والنهب والفساد والقطارات والعبارات والسرطان والعنوسة والبطالة والفقر والجهل والمرض و عندنا استعداد نفضل نتكلم ونحاول تاني وتالت , بس التعديلات دي هتحرمنا حتى من أبسط حقوقنا كبني آدميين وهو حق الكلام والتعبير, الموضوع مش المعارضة والناس بتوع السياسة بس , الموضوع هيضرنا كلنا , أي حد هيفتح بقه دلوقتي ممكن يبقى إرهابي مفيش حرمة ليه ولا لبيته وعرضه وحريته وكرامته , من حقنا نكون زي كل شعوب الدنيا اللي واخدة حقها والحكام بيشتغلوا موظفين عندها , من حق ولادنا يعيشوا في مصر أحسن من اللي احنا عشنا فيها , كل واحد فينا هيجيله يوم يسأل نفسه أو ولاده هيسألوه كان فين يوم ما البلد اتباعت وبقت تكية لمبارك والعصابة اللي معاه ؟!

دي آخر فرصة نتكلم واحنا لسة بني آدمين نرفض الاستعباد والذل اللي عايزينا نعيش فيه , يمكن تكون دي آخر مرة نقدر ننزل الشارع فيها نعبر عن رأينا ما هو بعد كدة اللي هيتكلم هيبقى إرهابي .

يوم الأحد 25\3 الساعة 6 هنكون كلنا في ميدان التحرير , كل الأحزاب والتيارات والاتجاهات , رجالة وستات , ولاد وبنات , هنبات ليلة في الشارع نقول كلمتنا ونوصل صوتنا ونبقى عملنا جزء من اللي علينا قدام نفسنا وولادنا وقدام ربنا , مهما يعملوا هننزل الشارع ومش هنخاف ومش حنسيب بلدنا عشان احنا أصحابها .

شباب بيحلم ببكرة
نتقابل يوم الأحد الساعة ستة في الحديقة المستديرة

للنشر في المدونات والمجموعات البريدية

عند علاء
عند اسد
عند BooDy
عند مالك
عند دماغ ماك
عند وائل عباس
مظاهره فى لندن
مظاهره فى واشنطن
عند كفايه
عند قطر الندى
عند كفايه حرام
عند بحب مصر

Comments

Submitted by salma (not verified) on Sat, 24/03/2007 - 2:11am

ta3del el destor el mara ele alf fe rob3 karn men lelah howa delwa2ty el sabab fe en ay president hayb2a leh el 7a2 en howa ye3adel fel destor w kanon el erhab 2al homa makanosh byra2bo el telephones w el mobiles w el computers kano byra2bo bas delwa2ty ba2a 3alashan el mawdo3 yb2a kanony ab2a a3da fel beet w fag2a ala2 wa7ed zai el darfa da5el 3alia la2 kwayes besara7a 3alashan ye3'aaro el nas ele mbawza el balad w batdaye2 awe men 7ewar el esteta2at dah bgd momel mahe kolaha hatet3'ayar a lazmetha kelma men wa7da 3andaha 14 yrs masr msh hatet3edel tany mafesh amal e7na weselna le mar7la mon7adera gedan w mafesh amal law 3amalna a bas nb2a odam rabena etkalemna

Submitted by Sharm (not verified) on Fri, 30/03/2007 - 1:49am

thank you ..

Submitted by اخبار العراق (not verified) on Sat, 28/06/2008 - 11:07am

المشكلة انة اصلا ماهو معبرنا سواء صحافة أو شعب !

Add new comment

Subscribe to /  digg  bookmark